موقع الأول نيوز الأخباري كن أول من يعلم
مقالات مشابهة
الاول نيوز – فيصل الصويص
شلونك ؟
طمني عليك
بعرف انك كثير مشغول بين التحديث الاقتصادي والإداري
والتعليم و الصحة والزيارات الميدانية و فوق هذا كله ارتفاع بنسب الفقر والبطالة و وضع إقليمي صعب وكل ما نقول الوضع هدي بترجع من جديد
انا ما بدي اسولف عن كل الي فوق لانه القصة بدهاش رأي ولا مستشارين و لا وزراء لو تقعد مع ختيار بالطفيلة أو شاب بالرمثا بحكيلك السولافه كلها والسلام عليكم
انا بدي احكي عن شغله اهم بالنسبة الي و لا حكومة اشتغلت عليها وهي المحبة والثقة مع الناس
والاردنيين يا دولة الرئيس شعب مش منقنق ولا بطلب المستحيل وبحب هالبلد وبخاف عليها وأنت بتعرف هذا الحكي كثير مليح
تعال اقولك.. قديش الباص السريع وربطه مع المحافظات ريح الناس قديش المواصلات المدرسية خلت الطلاب تنام ساعه زيادة والأهل بطلوا يهكلوا هم يدفعوا لباص خصوصي او سرفيس او تكسي ونص الراتب يطير
قديش انبسطنا بانجاز النشامى و وصولهم لكأس العالم وبشباب غماس و رجعت جو حطاب ليصور بالاردن
دكتور جعفر القصد من الكلام انه ممكن الحكومة تضل تجتمع بالرابع مليون اجتماع و بالمحافظات و ممكن بدل فرح نعمل ١٠٠ فرح بس كله هذا نتائجه ما بتصير بيوم وليلة بس ممكن قرار او مشروع صغير يفرق مع ابناء القرى والمحافظات والمخيمات
انزل الجمعة على هاشم وسط البلد وصلي بالمسجد الحسيني
و الاحد روح على اربد واقعد مع حجه ختيارة واشرب معها كاسة شاي و زور بعدها معان وشوف شو ناقصها وكلامي هذا لكل الوزراء و القصد مش انه انتوا قاعدين بالمكاتب لا القصد سولافه جدول الأعمال و البرتوكل واللقاءات مع نفس الأشخاص صار اشي ممل للناس و حتى الك
ويعطيك الف عافيه ومر اشرب قهوة بالفحيص بي عنا شارع سياحي جديد لسا ما عملنا في اشي حتى مرفق صحي مافي بعيد عنك بلكي على الله قدرنا نحط لفحيص على خارطة السياحة المحلية و على برنامج اردنا جنة
